Црна Гора привремено ги укина визите за граѓаните на Саудиска Арабија, велејќи дека мерката може да и помогне на туристичка индустрија во земјата. Премиерот Дритан Абазовиќ рече дека земјата треба да ја прошири својата понуда, бидејќи меѓународната изолација на Русија поради нејзината инвазија на Украина веројатно ќе има негативно влијание врз летната сезона.
„Наша обврска е да отвориме нови пазари поради настаните во Источна Европа кои негативно ќе се одразат и на Црна Гора, бидејќи нашата земја беше многу популарна меѓу руските и украинските туристи. Укинувањето на визите може да биде добро за нашиот туризам и верувам дека граѓаните на Блискиот Исток ќе бидат задоволни“, рече Абазовиќ.
„Саудиската авиокомпанија Flynas ќе започне со директни летови за Црна Гора од 1 јуни и очекуваме туристи од оваа земја“, додаде тој.
Туризмот сочинуваше приближно 25 отсто од вкупното економско производство на Црна Гора во 2019 година, но во пандемијата во 2020 година, туристичките посети паднаа за 85 отсто, намалувајќи го приходот од туризмот на само 3,5 отсто од БДП.
Според владините податоци, туризмот учествувал со 22 отсто од економското производство минатата година.
На 20 април, Црногорската туристичка организација предупреди дека земјата може да загуби 20 отсто од приходите од туризмот оваа година поради руската инвазија на Украина, сугерирајќи дека земјата треба да се обиде да ги надополни бројките и од ЕУ и од Средниот Исток. (Балкан инсајт)