Северна Македонија ќе дисеминира знаење на Црна Гора за искористување на средства од ИПАРД и воведување на ИАКС систем, информираат од Агенцијата за финансиска поддршка во земјоделството и руралниот развој (АФПЗРР).
Ова е еден од заклучоците од денешната средба на директорот на Агенцијата за финансиска поддршка во земјоделството и руралниот развој, Никица Бачовски со црногорскиот министер за земјоделство Александар Стијовиќ и државната секретарка за земјоделство Николина Мишниќ.
Како што пренесуваат од АФПЗРР, на состанокот се разговарало како двете институции да обезбедат меѓусебна соработка и заемно да си помагаат во насока на развој и јакнење на административната структура и зголемена апсорпција на средствата и од националниот и од ЕУ буџетот.
Директорот на АФПЗРР, Никица Бачовски истакнал дека со интензивирање на комуникацијата на политичко и техничко ниво се отвораат и нови можности за размена на искуства и меѓусебно помагање на патот кон ЕУ и за двете земји.
– Република Северна Македонија преку Агенцијата за финансиска поддршка во земјоделството и руралниот развој, веќе долго време ја реализира ИПАРД програмата. Најдобар доказ дека и институцијата и земјава имаат капацитет за нејзина успешна имлементација е целосното искористување на расположливите средства одобрени од ЕУ, преку ИПАРД 2 програмата. Потврда дека сме лидер во регионот за искористување на средствата од ИПАРД 2, пристигна и од Директоратот за земјоделство на ЕУ, истакнал Бачовски.
Министерот за земјоделство на Црна Гора порачал дека се добредојдени сите искуства и насоки со цел успешна имплементација на ИПАРД програмата во Црна Гора, но и апсорпцијата на средствата од националниот буџет.
– Заедничкото минато, географската близина, и досегашното искуство се гарант за успешна соработка во иднина. Имаме многу што да научиме од институционалната меморија на вашите служби и се надеваме дека вашата поддршка во нашите реформи нема да изостанат, истакнал Стијовиќ.
Двете институции, како што наведува, заедно со Министерството за земјоделство, шумарство и водостопанство, во наредниот период ќе склучат и договор за соработка со што и официјално ќе почне меѓусебната соработка.