На денешниот панел „Отворен Балкан – предности и недостатоци за Црна Гора“, што се одржа во Подгорица, потпретседателот на црногорската влада и министер за земјоделство, шумарство и водостопанство Владимир Јоковиќ подвлече дека „Отворен Балкан“ во кој засега членуваат три држави, не се занимава со политички прашања. „Ова е чисто за економски прашања и за тоа да има полесен проток на луѓе, стоки и капитал, а во сите документи што се потпишани се нагласува потребата за побрз влез на земјите од регионот во ЕУ“, рече Јоковиќ.
Според него, сите што велат дека „Отворен Балкан“ е контрапродуктивен на патот на која било земја кон ЕУ, имаат погрешен пристап, или тенденциозен или поради неинформираност. „Отворен Балкан не е кочница за ниту еден друг процес, тој е надополнување на се што се случува и е прилагоден на економскиот интерес бидејќи овозможува протокот на стоки, луѓе и капитал да се реализира без никакви проблеми. Исто така, би имало единствен документ за идентификација за побрзо преминување на границите на граѓаните, како и голема помош и договори за заедничко дејствување како одговор на природни катастрофи“, додаде Јоковиќ.
Како што наведе, „Отворен Балкан“ е фокусиран и на соработка во туризмот, каде може да се прават заеднички настапи и програми за пристигнување на туристи во регионот. „Црна Гора треба да биде дел од Отворени Балкан, не поради нечии интереси, туку поради граѓаните и компаниите. Стратешки интерес треба да биде патот кон ЕУ, но не можеме да занемариме нешто што ќе го олесни протокот на луѓе и капитал и ќе донесе придобивки за економиите“, рече Јоковиќ и додаде дека треба Црна Гора да разговара за деталите и пристапот од таа страна, а не со премногу широка елаборација која не се однесува на суштината.