Специјалното државно обвинителство доставило предлог до Вишиот суд во Подгорица на поранешната претседателка на Врховниот суд на Црна Гора, Весна Меденица, да и се одреди рок од 30 дена, соопшти Вишиот суд.
Одлуката ќе ја донесе судијката Сузана Мугоша, позната на пошироката јавност по судскиот процес за обид за тероризам кога ги осуди лидерите на Демократскиот фронт (ДФ), Андрија Мандиќ и Милан Кнежевиќ на по пет години затвор. Таа пресуда Апелацискиот суд ја укина и ја врати на ново решение.
На поранешната претседателка на Врховниот суд Меденица во моментов и е одредена мерка притвор до 72 часа. Таа по сослушувањето е вратена во Клиничкиот центар на Црна Гора поради нејзината здравствена состојба, пренесува агенцијата Бета.
Меденица, која беше на чело на црногорското правосудство во изминатите 17 години, е обвинета за создавање криминална организација и незаконско влијание.
Специјалното државно обвинителство претходно покрена предмет против нејзиниот син Милош врз основа на податоците на Европол, според кои тој наводно се занимавал со шверц на цигари и трговија со дрога.
Од 2003 година, Весна Меденица извршуваше две од најважните функции во судството. Четири години беше Врховен државен обвинител на Црна Гора, а потоа три мандати беше на чело на Врховниот суд од 2007 до декември 2020 година, кога поднесе оставка.
Нејзиниот повеќекратен мандат на чело на Врховниот суд наиде на критики од дел од меѓународната и домашната јавност затоа што постои уставна одредба дека исто лице не може да биде избрано на таа функција повеќе од два пати. (Ал Џезира)