Основачот на Фејсбук Марк Цукерберк пред американските сенатори, презеде вина за протекувањето на приватните податоци на корисниците.
– Сега е јасно дека не направивме доволно за да ги спречиме овие алатки да бидат злоупотребени – рече Цукерберг.
Четириесет и четири сенатори, членови на двете комисии, му поставуваат прашања и секој има по четири минути за прашање и уште толку да слушне одговор.
Техничкиот гигант “Фејсбук” и фирмата за анализа на податоци “Кембриџ Аналитика” се во центарот на скандалот околу собирањето и користењето на личните податоци – и дали тоа било искористено за да влијае на резултатот од претседателските избори во 2016 година или референдумот на Брегзит во Велика Британија.
Возниак: Фејсбук од своите корисници направи продукти
Соосновачот на „Епл“, Стив Возниак вчера во изјава за неколку американски ТВ мрежи укажа дека Марк Цукерберг нема да направи ништо за да ја „исправи грешката со Фејсбук“.
Цукерберг е под огромен притисок од јавноста поради улогата на социјалната мрежа во загрозување на приватноста на милиони корисници и руската вмешаност во изборите во 2016 година. Тој денеска со почеток во 14 часот по локално време (20 часот по македонско време) го започна сведочењето пред сенатските комисии за правда и за трговија.
Возниак изјави дека Цукерберг би можел да ја исправи грешката, но дека тоа нема да го стори.
– Карактерот на личноста на се менува. Се вршат мали измами и се прават лесни дела, но ако заштитата на вашата приватност чини пари, тогаш нема да направам ништо, го опиша тој основачот на Фејсбук.
Возниак додаде дека компанијата „Епл“ целосно се придржува до заштита на приватноста на своите корисници, додека Фејсбук од своите корисници направила продукти.
Тој минатата недела го исклучил својот профил на оваа социјална мрежа како реакција на кршењето на приватноста. Ова го сторија безброј други познати личности во САД.