Министерот за правда Никола Тупанчески иако бил планиран како говорник, го откажал учеството на денешната конференција на тема враќање на довербата на јавноста во правосудството.

Од Здружението на млади правници пред малку стаса информација до медиумите дека министерот нема да присуствува на денешната конференција „Унапредување на реформите во правосудството кон враќање на довербата на јавноста во правосудството“ организирана од Блупринт групата на граѓански организации за реформи во правосудството.

Од Здружението на млади правници велат дека кабинетот на министерот ги информирал дека ќе присуствува на тематска седница на владата, на која ќе се разговара за меѓународна помош, и затоа наместо него учество ќе земе државниот секретар во Министерството за правда.

Тупанчески, заедно со обвинителката Фатиме Фетаи и судијата Лазар Нанев се најдоа на удар на јавноста откако беше обелоденето дека на сметка на Фудбалската федерација на Македонија летале во Палермо на фудбалскиот меч со Италија, а воедно добиле и гратис влезници во ВИП ложата. Иако тројцата по враќањето тврдеа дека сами го платиле патот до Палермо, од ФФМ рекоа дека биле со чартер авион и дека ФФМ ги покрила трошоците за сите.

Од Државната комисија за спречување на корупцијата кратко ни рекоа дека се изненадени и шокирани од обидот на Тупанчески, Фетаи и Нанев, лажно да ги прикажат состојбите и дека ќе ги разгледаат можностите на ДКСК да интервенира. ДКСК ги повика уште веднаш тројцата да дадат изјави кој им ги покрил трошоците, но досега тие не го сторија тоа.

Во Кодексот за етика на судиите се вели дека не смеат да примаат протоколарни подароци чија вредност надминува 3.000 денари. Се додава и дека судијата е должен во вршењето на судиската функција и активности надвор од судот да развива стандарди на однесување кои придонесуваат за зачувување на угледот и достоинството на судот и судиската професија. Дел од Кодексот е и правилото дека судијата не може да го користи на угледот на судската професија за остварување или унапредување на своите приватни интереси.

Во етичкиот кодекс на обвинителите, пак, се вели дека тие не смеат да имаат непримерни врски со законодавната и извршната власт и дека  не смеат да ја користат својата службена положба и углед заради остварување на имотна и друга корист и не смеат да примаат подароци и бесплатни услуги, ако со тоа може да ја доведат во прашање нивната непристрасност и објективност.  Се додава и дека јавните обвинители се должни да внимаваат на своето однесување на јавните места и однесувањето воопшто, за да не нанесат штета на угледот на јавното обвинителсто или на јавнообвинителската функција.

И Кодексот за етичко однесување на членовите на Владата забранува носителите на извршни функции при вршењето на функциите и должностите да примаат подароци, освен во случаите, во износ и на начин утврдени со Законот за користење и располагање со стварите во државна сопственост и со стварите во општинска сопственост и Законот за спречување на корупцијата и судирот на интереси.

Фетаи и Нанев и денеска се на фудбалскиот меч со Португалија, кој вечерва се игра во Порто. (С.К.)