„Единственото решение кое што ни преостанува е да се направи внатрешна реорганизација во судството и јавното обвинителство, затоа што во нашата држава има судови и јавни обвинителства кои што се преоптоварени, а има и судови и јавни обвинителства каде се работи практично под норма. Тоа е единственото решение во моментов кое што би можело да има практичен контекст, затоа што на крајот на краиштата неприфатениот предлог ќе има одредени импликации, меѓутоа практично со една нова внатрешна реорганизација, делегирање на судии и јавни обвинители во судовите каде што нема доволен број, би можеле ако не друго барем прилично да го надоместиме она што ни недостасува“, рече денеска министерот за правда Никола Тупанчески во врска со минатонеделниот неуспешен обид да се одложи пензионирањето на 42 судии и 11 обвинители кои мораа да заминат во пензија.
„До крајот на годината ќе има 50-60 нови академци кои што ја завршиле Академијата за судии и јавни обвинители и на некој начин тоа ќе значи нов вид на инфузија на судството и јавното обвинителство. Да не заборавиме дека има уште 97 нови кандидати кои за година и пол-две ќе бидат интегрален дел од македонското судство или обвинителство, така што ако ги земеме тие 97-100 и овие 50 значи околу 150 луѓе ќе бидат надополнување или освежување на судско-обвинителскиот систем. Значи проблемот на е нерешлив, создава одредени тешкотии но сум оптимист дека ќе најдеме решение“, изјави Тупанчески во Струмица. (С.К.)