Во затворскиот менаџмент имаше одредени луѓе кои се именувани на одредени позиции, но не ги исполнуваат условите за да бидат на местото на кое се поставени, изјави министерот за правда Никола Тупанчески за вчерашната акција каде во 25 ќелии во КПУ Идризово беа пронајдени 37 ножеви, 50 мобилни, дрога и други забранети предмети.
„Министерството за правда почна да ги отстранува недостатоците кои претставуваат непочитување на некои одредби од законските прописи. Никој нема да биде поштеден од одговорност, но оставаме тоа да го решат надлежните институции, изјави министерот Тупанчевски.
Како што посочи тој, не се најсјајни условите во казнено поправните домови, а оваа констатација ја имаат и граѓаните на Македонија.
Во тој контекст беа преземени одредени активности за подобрување на состојбите, но и почеток на она што може да претставува реакција на сузбивање на тие девијантни појави.
На дополнително прашање за пријави од девојчињата дека добивале закани од затвореничките, министерот Тупанчевски повтори дека состојбата е подобрена, но не и целосно решена и дека како Министерство и УИС се обидуваат оптимално да реагираат. Директорот на Управата за извршување санкции Марјан Спасовски информира дека веќе е почната постапка за обезбедување услови и се во завршна фаза, а по исполнување на основните услови и законската рамка девојчињата ќе бидат преместени.
– Не само тоа, навистина има одличен објект во кој што е многу вложено и тој објект, според капцитетот на исполнетост исполнет е една третина. Значи навистина идеални услови за осудени лица кои немаат направено 18 години, меѓутоа ќе треба да се направат одредени адаптации за да може да биде комплетно ставен во функција. Мислам дека ниту финансиски е оправдано таквиот објект, ако ние имаме можност, а заради некои недоречености не ја користиме можноста во целост, рече министерот Тупанчевски.
М.Т.