Себастијан Фетел како пример за Петер Саган. Меѓутоа лош. Чешкиот велосипедист кој е светски шампион и важи за најдобар светски спринтер се избламира во четвртата етапа на Тур де Франс и се соочи со дисквалификација од натамошно учество во трката. Неспортскиот и срамен потег на Чехот се случи во завршните стотина метри на делницата од Мондорф до Вител во должина од 207,5 километри.

Во борба за што подобра позиција тој го употреби десниот лакт и го оттурна Марк Кавендиш. Британецот загуби контрола, рамнотежа и ритам и падна на асфалтот и со себе повлече уште неколку велосипедисти кои не можеа да ја избегнат непријатноста. По завршување на етапа и прегледување на снимките, организаторите решија да се „заблагодарат“ на Саган за учеството на трката иако Чехот се извини за непромисленоста.

Како последица на силниот пад, како што пренесуваат тамошните медиуми, Кавендиш се здобил со повреда на рамото. За нејзината сериозност што би значела и евентуалната пауза на Британецот, сепак, ќе се чекаат деталните лекарски прегледи.

Етапната победа на крајот ја славеше Французинот Арно Демар кој оствари време од 4:53,54 часа пред Норвежанецот Александар Кристоф и Германецот Андре Грипел кој се искачи на подиумот по бришењето на резултатот на Саган и дисквалификација од Тур де Франс 2017.

Британецот Џерент Томас остана ллидер во генерачниот пласман со вкупно време од 14:54,25 часа. На второто и третото место, со идентично заостанување (12 секунди), се неговиот сонародник Крис Фрум и Австралиецот Мајкл Метјуз.

Утре се вози петтата етапа на трката од Вител до Ла Планш долга 160 километри.