Алехандро Валверде мораше да се откаже од „Тур де Франс 2017“ уште во првиот натпреварувачки ден. Причина за повлекувањето на Шпанецот е тешкиот пад што го имаше во воведната етапа на престижната велосипедска трка чие 114 издание почна денеска во Дизелдорф. При минување на еден свиок, тој се лизна на асфалтот и со полна брзина удри во ограда крај патот по што веднаш беше хоспитализиран.
„Валверде не е во можност да продолжи да учествува во трката. Тажно е што е принуден да го заврши настапот уште на стартот“, напишаа во соопштението од екипата на „Мувистар“.
Пред почетокот на трката му беше одадена почит на поранешниот германски канцелар Хелмут Кол кој почина во 87 година од животот во неговиот роден Лудвигсхафен. По повод смртта беше одржана и комеморација во Европскиот парламент во Стразбур.
„Тур де Франс 2017“ почна со интонирање на „Ода на радоста“, химна на Европската унија (ЕУ). На екраните на стартот на трката беше истакната фотографија на која Хелмут Кол се ракува со поранешниот претседател на Франција, Франсоа Митеран во знак на германско-француско помирување. Моментот е овековечен во Верден, местото на една од најголемите битки за време на Првата светска војна.