Турската полиција денеска соопшти дека во две одвоени акции уапсила 61 лице, осомничени за поврзаност со џихадистичката група Исламска држава (ИД).
Како што јави државната агенција Анадолија, во првата акција во источниот округ Ерзурум биле приведени 22 осомничени припадници на ИД, меѓу кои и неколкумина истакнати членови на групата.
Во втората полициска операција, спроведена во седум општини во реонот на северозападниот град Бурса, биле уапсени уште 39 лица, под сомнеж за врски со ИД, меѓу кои и две жени.
Поголемиот број од приведените во реонот на Бурса се државјани на Сирија.
Турската полиција вчера во Анкара приведе 49 странски држајани, за кои постои сомнеж дека претходно како припадници на ИД учествувале во борбите во Сирија и Ирак, од каде по поразот на групата, илегално преминале во Турција.
Во друга акција, спроведена вчера во Истанбул, беа уапсени 63 осомничени припадници на ИД, за кои се претпоставува дека подготвувале терористички напад во трговски центар во истанбулската населба Бајрампаша.
Во неколку напади во Турција во последниве години, за кои одговорност презеде ИД, загинаа најмалку 319 лица.