Бројот на жртви од земјотресот што со јачина од 6,9 степени по Рихтеровата скала вчера ја погоди Турција се искачи на 31, бројот на повредени е 1.556 додека спасувачките екипи и натаму трагаат по преживеани под урнатините на станбените згради, соопштија властите.
Министерот за внатрешни работи на Турција, Сулејман Сојлу изјави дека 18 лица го загубиле животот во провинцијата Елазиг, а четири смртни случаи се регистрирани во Малатија. Националната Агенција за вонредни ситуации подоцна потврди за уште девет загинати лица.
Турскиот претседател Реџеп Таип Ердоган ги посети најпогодените подрачја од земјотресот. Притоа предупреди „да не се шират трачеви“ и информации од типот „рекла-кажала“ дека државата не е подготвена за вакви и слични природни непогоди.
„Не слушајте трачеви и негативна пропаганда. Да знаете дека сме ваши слуги“, рече во таа прилика Ердоган што го пренесе „Јуроњуз“.
Мурат Курум, министер за околина во турската Влада, истакна дека во двете провинции (Елазиг и Малатија) се урнати околу 30 објекти.
Епицентарот на земјотресот беше во близина на градот Сирвиџа, на длабочина од 6,7 километри. По најсилниот потрес, следуваа уште два со јачина од 5,4 и 5,1 степени. Провинцијата Елазиг се наоѓа на 750 километри источно од Анкара.