Турскиот суд денеска одлучи условно да ослободи седум новинари на весникот Џумхуриет, но ги задржа во притвор главните новинари за судскиот процес.
Но во притвор остануваат четворица новинари: колумнистот Кадри Гирсел, истражувачкиот новинар Ахмет Сика, главниот и одговорен уредник Мурат Сабунчуа и сопственикот на Џумхуриет Акин Аталај.
Групата од 17 новинари и соработници на весникот е обвинета за помагање на терористички организации.
Меѓународната заедница смета дека Турција ја загрозува слободата на медиумите.
Комесарот Јоханес Хан пред неколку дена отворено, пред турскиот министер за надворешни работи Мевлут Чавушоглу, ја изрази својата загриженост поради овој развој на настаните:
“Силно сум загрижен поради затворањето на многу новинари, писатели, академици и борци за човекови права”, рече Хан и потсети дека правната држава, демократијата и слободата на изразување се неопходни за да може Турција да се движи кон ЕУ.
Турскиот министер ги отфрли овие критики велејќи дека “никој не може да каже дека во Турција нема демократија” и дека “треба да се прави разлика помеѓу политичка опозиција и тероризам како и помеѓу вистински новинар и оние кои ги олеснуваат терористичките активности”.