И покрај бројните несогласувања, ЕУ и Турција направија вчера голем напор за да најдат и покажат што уште ги обединува двете страни.
Вчера во Брисел дојде шефот на турската дипломатија Мевлут Чавушоглу и се сретна со европската колешка Федерика Могерини и комесарот за проширување Јоханес Хан за време на Високиот политички дијалог помеѓу ЕУ и Турција кој се одржа вчера.
Точките на несогласување сепак се побројни од точките на согласност.
Пред се, уставната реформа во Турција и чистката која е одвива веќе цела година во оваа земја по неуспешниот обид за пуч од 15 јули 2016 година.
Помеѓу уапсените лица се наоѓаат критички новинари па невладината организација Амнести Интернешел вчера протестираше пред зградата во која се одржува средбата со Турција. Токму директората на оваа организација во Турција се наоѓа во затвор.
Комесарот Хан отворено, пред турскиот министер, ја изрази својата загриженост поради овој развој на настаните:
“Силно сум загрижен поради затворањето на многу новинари, писатели, академици и борци за човекови права”, рече Хан и потсети дека правната држава, демократијата и слободата на изразување се неопходни за да може Турција да се движи кон ЕУ.
Турскиот министер ги отфрли овие критики велејќи дека “никој не може да каже дека во Турција нема демократија” и дека “треба да се прави разлика помеѓу политичка опозиција и тероризам како и помеѓу вистински новинар и оние кои ги олеснуваат терористичките активности”.
Турчинот не ја пропушти можноста да спомене дека договорот за бегалците помеѓу ЕУ и Турција дозволи да сопре бранот на бегалци кои одеа кон ЕУ. И потсети дека Анкара со тоа го завршила својот дел од работата, додека Брисел се уште не го исполнил ветувањето за либерализирање на визниот режим. Тој побара исто така да се отворат преговарачките поглавија 23 и 24 од преговорите за членство со Турција. Со тоа, рече тој, ќе се одговори на загриженоста на ЕУ поради тоа што овие две поглавија се однесуваат на фундаменталните слободи и судството.
На ЕУ Могерини одговори дека Турција останува земја кандидат за членство но не можеше да каже дали и кога ќе продолжат преговорите за членство.
Помеѓу обединувачките точки беше спомената соработката на светската сцена како мировниот процес во Сирија, стабилизирањето на Либија и решавање на кризата помеѓу Катар и Саудиска Арабија како и понатамошна примена на нуклеарниот договор со Иран.
Сите соговорници констатираа дека околу овие прашања нема разлики во ставовите помеѓу Анкара и Брисел. Чавушоглу си замина без да ја намали загриженоста на ЕУ.