Поранешниот шеф на изборната кампања на претседателот на САД, Доналд Трамп, Пол Манафорт прогласен е за виновен по осум точки од обвинението за даночна и банкарска измама и непријавување банкарски сметки во странство. Поротата не успеа да постигне консензус за останатите 10 точки од обвинението.
Порототата го прогласи Манафорт за виновен за две од девет обвинувања за банкарска измама, сите пет обвиненија за даночна измама и една од четири обвиненија за непријавување сметки во странство.
Судијата прогласи дека судењето не е валидно за 10 точки од обвинението во поглед на кои поротата не можеше да постигне консензус.
Судењето на Манафорт, долгогодишен републикански оперативец, е прво што е одржано во рамки на истрага за руското мешање во американските претседтаелски избори во 2016 година што ја води специјалниот обвинител Роберт Малер.
Обвинувањата за Манафорт воглавно се однесуваат за период пред да работи во кампањата на Трамп.
Обвинителите го обвинија дека од американските даночни служби скрил 16 милиони долари заработени како политички советник на проруски политичари во Украина и потоа лажел банки за да обезбеди кредит од 20 милиони долари откако му пресушил изворот на приходи од Украина.
Трамп се обиде да се дистанцира од Манафорт по пресудата нагласувајќи дека сето тоа нема врска со него.
– Се чувствувам многу лошо поради Пол Манафорт. Јас во тоа не сум вмешан, наведе американскиот претседател.
Адвокатот Коен призна дека плаќале жени за да ги замолчат
Федерален суд во Њујорк му одреди кауција од 500.000 долари на Мајкл Коен, поранешниот адвокат на претседателот на САД Доналд Трамп, кој вчера се изјасни како виновен по осум обвиненија.
Коен беше обвинет за даночна и банкарска измама, како и за кршење на правилата за финансирање на изборни кампањи, поврзано со случаите во кои им давал пари на жени со кои Трамп имал љубовни врски да молчат пред јавноста. Обвинителството ова го гонеше како кршење на законите за предизборна кампања бидејќи јавните настапи на овие жени можеа да влијаат врз кампањата на Трамп.
Коен се соочува со казна затвор од четири до пет години, а спогодбата што ја постигнал со обвинителството е во насока на тоа да добие помала казна.
Во својот исказ тој потврди дека Трамп му наложил од свој џеб да им даде пари на порно актерката Сторми Даниелс и „зајачицата“ на „Плејбој“ Керен Мекдугал, за што подоцна добил пари од Трамп. Првата жена добила 130.000 долари за да молчи за врската со Трамп, а втората ја продала својата приказна на списанието „Нешнл Инквајерер“ во пресрет на изборите во 2016 година, но Трамп и Коен влијаеле таа да не биде објавена.