„Кралевите“ се домаќини на екипата од Варшава по 22 меча во низа без пораз во сите натпреварувања, Португалецот со два гола ќе стигна до 100 во европските клупски настапи
Реал Мадрид и Легија Варшава како „Давид и Голијат“ вечерва на „Бернабеу“ во меч од третото коло во групата Ф во Лигата на шампиони. За улогите на фаворит и аутсајдер нема потреба да се трошат зборови. Ќе рече некој „се е извесно овде, само е неизвесно со колку гола разлика ќе победи Реал“. Ако за победникот не постојат дилеми, тогаш постојат за Кристијано Роналдо.
Португалецот има 98 погодоци во европските купови и му недостасуваат уште два до јубилејната „стотка“ што никој досега не успеал да ја дофати. Ќе успее ли „ѕвездата на кралевите“ до подвигот останува да видиме вечерва.
Тренерот Зидан не може да смета на Рамос, Модриќ, Касемиро и Коентрао. Реал е без пораз во 22 меча во низа во сите натпреварувања и славеше во сите седум последни на домашен терен во Лигата на шампиони
Вториот меч во групата Ф што нуди и резултатска неизвесност се игра меѓу Спортинг и Борусија Дортмунд во Лисабон.
Два неизвесни меча во групата Е. Баер во Леверкузен го дочекува Тотенхен, ЦСКА во Москва ќе игра со Монако. „Фармацевтите“ не знаат за пораз на „Бај арена“ од март, а „спарси“ допатуваа во Германија со импресивен факт. Тимот од „Вајт Харт Лејн“ постигнуваше барем по еден гол на последните 21 натпревар.
Кај домашните под прашалник е настапот на Бендер, кај гостите ќе ги нема Алдервирлд и Кане. Баер викендот го совлада Вердер со 2:1 во Бундеслигата, Тотенхем ремизира со ВБА (1:1) во Премиерлигата.
На ЦСКА М. се чини не ѝ баш најдобриот во последниот период. Московјани беа трипати поразени во петте последни средби додека Монако загуби само два меча од 13. Иако Леонид Слуцки се сооочува со проблеми околу составот (ги нема Кауња, Џагоев, Еременко и Помазун), сепак, се надева дека неговиот тим ќе остане, најмалку, непоразен во натпреварот со францускиот лигаш во чии редови ги нема Алмами Траоре, Фалкао и Дирар.
Како што рускиот првак негува надежи дека ќе победи, така Игор Акинфеев посакува, конечно, да не биде совладан што не му се случило во ЛШ во последните 10 години.
Двојките за третото коло во групата Г се Лестер – Копенхаген и Бриж – Порто, а во групата Х, Јувентус му гостува на Олимпик во Лион, а Динамо Загреб е домаќин на Севилја.
Лига на шампиони
Вечерва играат
Група Е: Баер Леверкузен – Тотенхем, ЦСКА Москва – Монако
Група Ф: Реал Мадрид – Легија Варшава, Спортинг Лисабон – Борусија Дортмунд
Група Г: Лестер – Копенхаген, Бриж – Порто
Група Х: Олимпик Лион – Јувентус, Динам Загреб – Севилја
Сите мечеви почнуваат во 20.45 часот