Украинската волонтерска бригада ја објави смртта на четворица странски воени доброволци кои се бореле против руските сили и им оддаде почит на „нивната храброст, нивното сеќавање и наследство“.
Меѓународната легија за одбрана на Украина, официјална волонтерска бригада, објави дека четворицата мажи биле од Германија, Холандија, Австралија и Франција. Тие не прецизираа кога и под кои околности дошло до смртта.
„Ги загубивме нашите браќа во борба, но нивната храброст, нивното сеќавање и наследство засекогаш ќе не инспирираат“, објави Меѓународната легија.
Холандскиот државјанин, Роналд Вогелаар, беше погребан на 21 мај во Харков, вториот град во Украина, според АФП. Колегите рекоа дека тој бил убиен неколку дена претходно од артилерија. Еден Австралиец беше пријавен убиен во мај, а неговата смрт беше потврдена од портпаролот на одделот за надворешни работи. Тој беше идентификуван како Мајкл Чарлс О’Нил (47).
Во петокот, Париз потврди дека француски доброволец борец бил убиен во борба во Украина. Објавените извештаи велат дека тој загинал во артилериски оган во областа Харков.
На брифингот во четвртокот, руското Министерство за одбрана рече дека „елиминирало стотици странски платеници во Украина“, додавајќи дека 3.500 странски борци во моментов се во земјата. Министерството, исто така, предупреди дека заробените странски војници нема да бидат третирани според стандардите на меѓународното хуманитарно право.