Украински извори потврдија дека поголемиот дел од градот Покровск во регионот Донецк паднал под контрола на руските сили, пишува „Украинска правда“, која во опширна анализа го опишува драматичното влошување на ситуацијата на терен.
Според весникот кој се повикува на извор од Покровск, руските сили го држат речиси целиот град.
Покровск е во голема мера изгубен. Украинските позиции сè уште постојат на северните рабови на градот; сепак, поголемиот дел од Покровск е под контрола на окупаторите. Целиот дел од населбата под железничката линија што го пресекува градот на половина, според информациите на УП, го држат Русите. Достапните информации покажуваат дека контактната линија се наоѓа речиси по северниот раб на градот, изјавил извор за весникот.
Според „Украинска правда“, украинските одбранбени сили сè уште немаат ефикасно решение за потиснување на руските оператори на беспилотни летала, што е една од клучните причини за падот на градот.