Уметнички парчиња, уникатно дизајнирани од 25 модерни македонски ракотворци ќе бидат изложени на Дизајн маркетот во „Јавна соба“ денеска и утре од 10 до 18 часот. Посетителите ќе имаат можност да погледнат и купат парчиња рачно изработен накит, аксесоари изработени од кожа, маици со оригинални принтови, воздушни билки, керамички и дизајни изработени од дрво, различни аксесоари, облека со автентични детали…
Продуктите се оригинални, со потпис од познати македонски ракотворци: Монкдолс, Витрум Студио, Вудис, Ларго, Елена Ристовска, Ваша мала башта, Епокси, Солар Криешнс, Панорамикс, Мамка, Игнеа Козметикс, Цип/Ред, Гаиа, Слога, Зен Зил, Монозеро, Кејт Стардаст, Глигор Кузмановски, Добро ми стои, Блум, Сербез, Стичми везење, Сираледер, Азсу Аксесориз и Софија Огњановска.
Настанот е во рамките на „Скопје дизајн вик“, кој завршува во недела со забава во Литертура.мк во трговскиот центар „Дајмонд мол“, со DJ Дарко Марковски.
„Скопје дизајн вик“ е дел од европската мрежа на манифестации за дизајн во друштво на „Миксер“ од Белград, What Design Can Do од Амстердам, „Барселона дизајн вик“ и Австрија „Дизајн“. Сите платформи во фокус ја ставаат Зелената агенда и еко дизајнот на идните млади дизајнери под мотото Next Gen Design.