Унгарија започна анти-европска кампања наречена “Стоп за Брисел” и побара од граѓаните да размислуваат како да се спротивстават на политиката на Брисел која, како што вели унгарската влада, е закана за независноста на земјата.
Секое домаќинство добива прашалник и треба да одговори на шест прашања како “што би требала да направи Унгарија ако Брисел сака да ги пушти мигрантите илегално да влегуваат и покрај неодамнешната серија терористички напади во Европа”.
Понудени се два одговори: „да им се овозможи на мигрантите слободно да се движат низ земјата” или „ да се држат под контрола додека чекаат властите да го решат нивниот случај“.
Премиерот Виктор Орбан неодамна даде наредба со која за мигрантите и бегалците систематски да се затвораат во кампови по должината на унгарско-српската граница. Законот стапи во сила во вторникот.
Друго прашање се однесува на невладините организации кои се финансирани од странски фондови и кои унгарската влада сака да ги оневозможи да работат бидејќи тие, според владата, се мешаат во внатрешните работи на земјата.
Веќе се месеци унгарската влада врши силен притисок врз невладините организации и особено тие кои ги финансира Фондацијата Отворено општество на Џорџ Сорос.
САД се загрижени за предлог законот на унгарската Влада од 28 март, со кој се воведуваат нови, таргетирани и огромни регулаторни барања за странските универзитети.
„Доколку бидат усвоени, овие промени негативно ќе влијаат или дури ќе доведат до затворање на Централно-европскиот универзитет (ЦЕУ) во Будимпешта“, се вели во реакцијата на Стејт Департментот.
“Големи одлуки и борби се пред нас, а Унгарија од тоа може да излезе како победник само ако ја има поддршката на целата земја”, изјави владин претставник.