Универзитетското студентско собрание при УКИМ нема веќе да организира собири по повод трагедијата во Кочани.
Претходно тие имаа најавено дека ќе организираат собири на кампусите во текот на целата недела, откако се одржа првиот на платото пред УКИМ каде беше исвиркана министерката за образование Јаневска, тие организираа уште еден собир на техничкиот кампус и известија дека веќе нема да се собираат.
Со цел да не се создаваат поголеми гужви во моменти кога медицинската помош и полицијата се најпотребни на други локации, големи собири по кампуси нема да се организираат, како што беше првично планирано. Активностите за искажување на почит и сочувство ќе можат да се организираат на ниво на факултети, по иницијатива на факултетските студентски собранија, а УСС-УКИМ ќе понуди логистичка помош, велат од УСС-УКИМ.
Оттаму повторија дека на првиот собир од нивна страна не била поканета министерката за образование.
Министерката од наша страна не беше поканета да присуствува, ниту да одржи говор. Нејзиниот говор, самото одржување, како и неговата содржина не беа во агендата на одвивање на настанот. Нашата одлука, за која што со мнозинство се изгласа на состанокот на 16.03, беше само двеминутно обраќање на ректорката во знак на солидарност и изразување сочувство, велат од УСС-УКИМ.