Синдикатот на работниците од Управата, правосудните органи и здруженијата на граѓани (УПОЗ) и Здружението на судската администрација (ЗСА), тврдат дека вработените во судовите се излажани од претседателот на Судскиот совет, Зоран Караџоски, бидејќи тие не го добиле ветеното покачување на платата од 10 отсто, ниту пак ја примиле мартовската плата.
Синдикатот реагира на „неодговорниот однос на претседателот на Судскиот буџетски совет, Зоран Караџовски, поради чие неодговорно однесување и политиканство, вработените во судовите не само што не го добија ветеното зголемување од 10% туку ги остави и без плата пред најголемиот христијански празник, Велигден“, пишуваат синдикалците во соопштението.
Синдикатот на УПОЗ бара да престане неодговорниот однос кон вработените во судовите од страна на Претседателот на Судскиот буџетски совет и одговорните лица во Министерството за финансии.
-Бараме одговор зошто доколку во буџетот на Р. Македонија не биле предвидени средства за исплата на зголемувањето на плата во висина од 10 отсто на сите вработени во судовите им се поделија решенија за утврдување на работна успешност за месец март во висина од 10 отсто на основната плата, се наведува во реакцијата на УПОЗ и ЗСА.
Членовите на Судскиот совет на итна седница пред крајот на март донесоа нов Правилник за додатоците на плата на судиите. Со него судиите, но и судската администрација треба да добијат повисоки мартовски плати за 10%. Претседателот на судскиот совет, Зоран Караџоски, по итната седница изјави дека брзале поради тоа што било крај на месецот, за да се завршат пресметките и мартовската плата која се исплаќа до 15 април да биде повисока.
Караџоски тврдеше дека е оправдан револтот кај судиите кога дознале дека јавните обвинители и јавнообвинителските службеници зеле повисока февруараска плата за 20%. Тој се повика на Законот за платите на судиите од декември, 2015 година, во кој платите на судиите и обвинителите предвидува зголемување за 35%, но тие пари никогаш не легнале на контото на судиите.