Властите во САД издадоа наредба за евакуација на над пола милион жители на американскиот брег во Мексиканскиот залив поради ураганот „Лора“ кој може да ги погоди Тексас и Луизијана. Невремето, според тамошните медиуми, е проследено со силен ветар и се очекува да предизвика поплави и големи бранови.
Повеќе од 385.000 луѓе треба да бидат евакуирани од градовите Бомонт, Галвестон и Порт Артур во Тексас, а наложена е евакуација и на уште 200.000 жители од пониските области во југозападна Луизијана, каде бранови високи, речиси, четири метри би можеле да поплават цели места.
Националниот центар за урагани предвидува дека „Лора“, поради топлата вода во заливот, ќе се засили во ураган од трета категорија пред да удри во копното, со ветрови со брзина од 185 километри на час, што може да предизвика катастрофални штети.
„Силниот ураган ќе го погоди копното во среда во доцните часови или рано во четврток“, рече Ед Рапапорт, заменик директор на Националниот центар за урагани.
Ураганот „Лора“ мина крај Куба, откако најмалку 20 лица загинаа во Доминиканската Република и тројца на Хаити, каде што доведе до прекини на електричната енергија и поплави.