Ураганот „Лoра“ протатни низ американската сојузна држава Луизијана и остави зад себе шест мртви, пустош и рушевини. Невремето мина во сојузната држава Арканзас и донесе обилни дождови и разурнувачки удари од ветер.
Во градот Вестлејк во Луизијана, ураганот предизвика пожар во една хемиска фабрика од која повеќе од 24 часа чади отровен чад. Експертите проценуваат дека ќе бидат потребни неколку дена да се установат прецизните размери на материјалната штета од ураганот.
Досега „Лора“ уништи и оштети над 867.000 станбени и деловни објекти во Луизијана, Тексас и во Арканзас, пренесе новинската агенцијата „Ројтерс“.
„Ова е најсилната и најразорната бура која некогаш ја погодила Луизијана и сè уште не престана да сее смрт и деструкција“, изјави гувернерот на Луизијана, Џон Бел Едвардс.
Засега, најсилните просечни удари на ветер се движат со брзина од околу 240 километри на час, што е значително повеќе од ветрот кој го следеше разорниот ураган „Катрина“ кој во 2005 година го разори Њу Орлеанс.
По Арканзас, ураганот, како што прогнозираат стручњаците, ќе продолжи по долината на реката Мисисипи, а потоа низ централните делови на САД.
Претседатаелот Доналд Трамп одржа состанок со Сојузната агенција за вонредни состојби на кој му беше поднесен детален извештај за ситуацијата на терен. Трамп најави дека за време на викендот ќе ги посети погодените подрачја поради што одлучи да го одложи својот говор пред Републиканската национална конвенција.