„Ги повикуваме сите соборци и соборки денес во 21 часот пред СЈО. Денес е 1. Уште еден ден до 18ти, до денот кога требаше да се гарантира заштитата на СЈО. Напротив, бандата во фотелјите одлучи да ја задржи таа карта за да може да го држи СЈО во заложништво со цел да има подобра позиција на евентуалната преговарачка маса. Нема да им помине. СЈО е нашата тврдина, не им ја даваме. Дојдете на герила акцијата за бројот 1, за последниот ден на тактизирање на режимот.“, напиша Павле Богоевски, еден од предводниците на Шарената револуција на својот фејсбук профил.
Инаку, Шарената револуција најави голем протест за во понеделник (20.јуни) кој ќе започне во 19 часот пред Специјалното јавно обвинителство, по истекувањето на ултиматумот даден до 18-ти месецов кога Уставниот суд треба да се произнесе за легитимноста на СЈО.
– На оваа корумпирана и криминална власт и дадовме и повеќе од доволно време да реагира и да ги слушне нашите барања. Тие се глуви пред своите граѓани. Единственото нешто на што тие мислат е како побрзо да избегаат од правдата. Специјалното јавно обвинителство е првата светлост во оваа правна темнина во која живееме, а власта го кочеше уште пред да биде формирано. После денешната одлука на Уставниот суд да не го стави СЈО на дневен ред ниту за следната своја седница, очигледно е дека Груевски и неговите соработници се обидуваат да го укинат СЈО кога најмалку ќе очекуваме, се вели во образложението на “Шарените“.
Демонстрантите кои се дел од протестите велат на Груевски му е дојден крајот, само треба уште малку да биде притиснат.
– Да бидеме сплотени и здружени како никогаш порано! Да му ставиме крај на ова црно зло што ни ја уништува државата! Граѓаните доаѓаат правдата и демократијата да ја земат во своите раце! Смрт за фашизмот, слобода на народот! Нема правда, нема мир!, се вели во пораката од Шарена револуција.