Дете на возраст од шест години со возило на Итна медицинска помош од Охрид е упатено на Клиниката за детски болести во Скопје, изјави за МИА директорката на Државниот санитарен и здравствен инспекторат (ДСЗИ), д-р Ирина Сотирова Бухова.
– Детето е во многу полесна состојба, свесно, контактибилно, значи не е тешка клиничка состојба како што беше 14-годишното девојчето на КАРИЛ, рече Сотирова Бухова.
Детето попладнево е примено Клиниката за детски болести, стабилно е и не е во животозагрозувачка состојба, изјави за МИА ендокринологот Марина Крстевска Константинова од Клиниката за детски болести.
Таа рече дека станува збор за дете на возраст од девет години на кое кога го примиле резултатот од измерениот шеќер во крвта му бил 14.
– Ќе го ставиме на инсулинска терапија која мора да ја прима. Од Општата болница во Охрид беше препратено. Таму му бил утврден дијабетес. Сите деца со дијабетес тип 1 се препраќаат на Детската клиника за да им се одреди терапија и начин на исхрана и да се едуцираат родителите за терапијата која мора да ја прима детето, рече Крстевска Константинова и додаде дека зависно од состојбата најчесто на Клиниката остануваат една недела.
Станува збор за четврти случај на дете со дијабетес донесено на Клиниката за детски болести за само една недела.
Изминатите денови на Клиниката било донесено 14-годишно дете од Охрид во тешка здравствена состојба, кое поради сериозноста на здравствената состојба потоа е упатено на КАРИЛ, а биле примени и деветгодишно од Гевгелија и тригодишно дете од Свети Николе кое сега е пуштено дома.
На денешната прес конференција на директорката на Државниот санитаер и здравствен инспекторат Ирина Сотирова Бухова и на заменик министерот за здравство Асим Муса беше кажано дека кај матичните лекари е извршен инспекциски надзор и се очекуваат резултатите.
Девојчето е надвор од кома и се опоравува.
Муса ја лоцираше вината кај родителите, односно поради неедукацијата за откривање на вакви состојби.