Според првите неофицијални резултати од референдумот во Република Српска и врз основа на 30,76 отсто обработени избирачки места, 99,80 отсто од граѓаните порачале дека сакаат 9 јануари да биде Ден на Република Српска.
Излезноста на референдумот била помеѓу 56 и 60 отсто запишани гласачи па според законот референдумот е легитимен.
Ова народно изјаснување се одржа седум дена пред локалните избори во Босна и Херцеговина. Иако се очекуваше дека ќе има инциденти, референдумот помина мирно.
Премиерката на Република Српска Жељка Цвијановиќ изрази задоволство од мирниот изборен ден и оцени дека референдумот е успешен.
Претседателот Додик оцени дека денешниот ден е важен и свечен за Република Српска.
Претседавачот на Претседателството на Босна и Херцеговина Бакир Изетбеговиќ оцени дека референдумот за Денот на Република Српска не е ништо друго освен инает на претседателот Милорад Додиќ. Изетбеговиќ му предвиде на Додик судбина на Садам Хусеин, Гадафи и Слободан Милошевиќ и рече дека слична реакција на меѓународната заедница ќе стаса во наредните денови:
“Мислам дека ќе дојде до реакција на меѓународната заедница. Видовме како Садам Хусеин, Гадафи и Милошевиќ се инаетат и како тоа изгледа”, рече Изетбеговиќ на Н1ТВ.
Референдумот има советодавен карактер и дава мислење за актот што ќе биде донесен во согласност со мнозинсото изјаснување на граѓаните на референдумот. Тој се одржа во услови на подогнати тензии на релација Бања Лука – Сараево, со оглед на тоа дека Уставниот суд на БиХ кој раководството на РС не го признава, се изјасни дека референдумот е неуставен