Во среда на дневен ред на седницата на Уставниот суд ќе бидат одлуките за помилување на 56 политичари, функционери и нивни соработници донесени од претседателот Ѓорѓе Иванов на 12 април годинава. Иако аболицијата е целосно поништена, сепак ова прашање ќе се отвори пред највисокиот суд во државава.
Според информации на НОВА од судот, иницијативата за оспорување на помилувањата била поднесена во Уставен уште пред тие да бидат поништени, па на седницата во среда немало да има никакви промени. Се очекува само формално да биде констатирано дека одлуките за помилување повеќе не се на сила.
Иванов на 27 мај поништи дел од одлуките за помилување, а десет дена подоцна објави дека целосно ја поништува аболицијата. Меѓу помилуваните беа дел од лицата кои сега се осомничени и обвинети од Специјалното јавно обвинителство.
Аболирани од страна на Претседателот беа: поранешниот премиер Никола Груевски, екс министерката за внатрешни работи Гордана Јанкулоска, бившиот министер за транспорт и врски Миле Јанакиески, поранешниот шеф на УБК и началникот на петта управа Сашо Мијалков и Горан Грујоски, шефот на кабинетот и генералниот секретар на Владата Мартин Протуѓер и Кирил Божиновски, градоначалникот на Пустец Едмонд Темелко, лидерот на СДСМ Зоран Заев, ексразузнавачот Зоран Верушевски или вкупно 56 лица од кои рекордер по бројот на помилувања беше поранешниот министер Јанакиески чие име се спомнуваше во 16 одлуки.
И додека на дневен ред на Уставниот суд се ставаат одлуки кои веќе се поништени, оценувањето на уставноста на Специјалното јавно обвинителство никако да се најде пред судиите во овој суд.
„Ако се укине СЈО, најмалку важно во Македонија ќе биде дали ќе има избори или не“, потенцираше Зоран Заев.