Уставниот суд на денешната седница со мнозинство гласови се прогласи за ненадлежен за иницијативата на Движењето за реформи во ДПА кое го предводи Зијадин Села која се однесуваше на одлуката на Советот на општина Бутел за поставување на урбана опрема – крст.
– Од содржината на оспорената Одлука произлегува дека во конкретниот случај станува збор за поединечен правен акт со кој на конкретен субјект – Светскиот македонски конгрес се дава согласност за поставување на урбана опрема на локација во Општина Бутел, врз основа на претходно барање на субјектот, односно дека трошоците за поставување и изведување на опремата, ќе бидат на товар на подносителот на барањето, а од содржината на оспореното решение произлегува дека станува збор за технички акт – објавување на оспорената „Одлука во Службен гласник на Општина Бутел“.
Имајќи предвид дека во надлежноста на Уставниот суд е оцена на општи прописи кои содржат општи норми на однесување… во конкретниот случај оспорениот акт не ги содржи правните елементи кои го одредуваат прописот како подобен за уставно- судска оцена. Оценивме дека настапени се условите од членот 28 алинеја 1 од Деловникот на Уставниот суд за отфрлање на иницијативата, се вели во Решението на Уставен.
Коментирајќи ја кратко оваа одлука за НОВА, градоначалникот на Струга вели, истата ја очекувал, но со ова Уставниот суд направил преседан и се подразбирало дека на сите општински совети низ Македонија им се дава право да си донесат свои одлуки за поставување на урбана опрема.
– За поднесување на иницијатива до Уставниот суд секој има право. Уставниот суд треба да знае дека нивните одлуки се коментирани и политизирани. Јас очекував ваква одлука но тоа сега подразбира дека советите низ Македонија сами може да си носат вакви одлуки, бидејќи Уставниот суд направи преседан, изјави Села.
Во март годинава, група граѓани од населбата Бутел 1 на околу половина километар од местото каде што поддржувачите на ДУИ кампираа на камен темелникот за крстот протестираа за како што рекоа, опструкциите кои ги прават граѓаните – Албанци против симболот на христијанството.
Активистите на ДУИ пак, предводени од Ермира Мехмети, Талат Џафери, Рафиз Алити, Абдулаким Адеми и градоначалникот на Чаир, Изет Меџити, тргнаа од Чаир кон Бутел каде што откако го растурија камен темелникот, останаа да кампираат на местото додека кордон полицијаци од специјалните единици, и оклопни возила ја обезбедуваа линијата за да не дојде до судир.
Генералната секретарка на Уставен, Оливера Филиповска, чиј мандат истече на 1.септември годинава, брифираше дека се очекува во најскоро можен рок судиите да се сретнат и да одлучат за нов генерален секретар со оглед на тоа што претседателката Елена Гошева наредната недела ќе биде на службено патување.
И покрај инсистирањата на новинарите за тоа кога ќе се случи расправата на Уставен за утврдување на законитоста на Специјалното јавно обвинителство, Филиповска вели немала конкретен одговор бидејќи тоа зависи од судијата-известител кога материјалите за предметот СЈО ќе го достави на дневен ред до претседателката Гошева.