Со одлука на Уставниот суд ќе биде укинат ставот 3 од членот 163 од Законот за банките, според кој приоритет во стечајната постапка имаат побарувањата на Фондот за осигурување на депозити. Уставниот суд постапуваше по иницијатива на Здружението на оштетени физички и правни лица на Еуростандард банка „Правда за штедачи”.
Ставот 3 од членот 163 од делот на Законот за банки кој се однесува на стечајна постапка гласи: „Побарувањата на Фондот за осигурување на депозити по основ на исплати на осигурени депозити се исплаќаат пред побарувањата на останатите доверители“.
Иницијативата до Уставниот суд ја поднесе Здружението на оштетени физички и правни лица од Еуростандард банка „Правда за штедачи”, соред кои сите штедачи треба да бидат третирано еднакво и тие со штеден влог до 30 000 евра и тие што имале над 30 000 евра, но и фирмите, кои во домашните закони не се заштитени со минимална сума при пропаѓање на банка.
Здружението „Правда за штедачи” оцени дека денеска Уставниот суд донел позитивна одлука.
„Би сакале да и пренесеме на пошироката јавност дека денес Уставниот суд донесе позитивна мериторна одука по однос на ова прашање“, наведоа во соопштение од Здружението.
Согласно актуелното законско решение Фондот за осгурување депозити ги обесштетува осигурените депозити до 30 000 евра во денарска противвредност, оние над тој износ, како во случајот и со Еуростандард банка, се пријавуваат како побарувања од стечајната маса.
Народна банка ѝ ја одзеде дозволата за работа на Еуростандард Банка во август минатата година и веднаш потоа беше отворена стечајна постапка, а веќе во септември почна исплатата на средствата од Фондот за осигурување на депозити.