Уставниот суд одлучува дали останува поништувањето на аболицијата. Судиите оценија дека одредбите се надвор од правниот поредок и не можат да бидат предмет на оценување на уставноста.
Станува збор за одлуките за помилување донесени од претседателот на 12-ти април, што Иванов ги повлече на 6-ти јуни годинава. Иницијативата за оценување на уставноста беше поднесена по нивното објавување.
„Во овој случај, имајќи ги предвид наведените уставни и деловнички права и, пред сè, фактот што оспорените одредби по поднесувањето на иницијативата престанале да важат, и со самото тоа веќе не се дел од правниот поредок, цениме дека не постојат процесни претпоставки за нивно оценување, односно не можат да бидат предмет на оценување на уставноста пред овој Суд“, рече судијата известител Гзиме Старова.
Таа смета дека Уставниот суд треба да ја отфрли иницијативата. По завршувањето на седницата, уставните судии треба да гласаат дали ќе поведат постапка за оценување на уставноста на оспорените одредби.
На 12 април годинава, претседателот Иванов ги донесе одлуките за помилување на 56 политичари и нивни соработници. По силниот домашен и меѓународен притисок, на 27 мај претседателот Иванов ги повлече аболициите само за политичарите, а подоцна, на 6 јуни, беа повлечени сите аболиции.