Одлуката на Уставниот суд со која се укина нормираниот учинок за исплата на минималната плата, значи дека газдите повеќе нема да можат да го избегнуваат плаќањето на минималецот. Од „Гласен текстилец“, кои ги застапуваат правата на работниците, велат дека со оваа одлука очекуваат секој работник да добие по 12.000 денари минимална плата.
Одлуката на Уставниот суд влегува на сила кога ќе биде објавена во Службен весник.
„Уставниот суд на Република Македонија по повод иницијативата на Сојузот на синдикатите на Македонија на седница одржана на 18 април 2018 год со Одлука У. Бр. 133/2017-1 ги укина член 2 став 1 во делот: „и исполнет нормиран учинок“ и ставовите 2, 3 и 4 и член 7-б ставови 1 и 3 од Законот за минимална плата во Република Македонија“, соопштија од ССМ.
Со ова се укина одредбата од Законот за минимална плата во која беше наведено дека работодавачот е должен да му исплати на работникот најнизок месечен износ на основна плата, која според законските одредби не зависи само од извршената работа во полно работно време, туку и од исполнетиот нормиран учинок, кој го утврдува работодавачот.
Според работниците, газдите ја користеа оваа одредба за да не исплатат минималната плата – дури 50 проценти од работниците кои се согласиле да одговорат на анкетата од „Гласен текстилец“ рекле дека во нивната фирма е утврден учинок односно норма.
Во ова истражување направено кон крајот на март, една третина од работниците кои се согласиле да зборуваат во анкетата, рекле дека не ја добиле минимална плата, а 40 проценти изјавиле дека работното време им е зголемено.
„Платата достигна 12.000 денари, ама работното време е двојно зголемено. Од нас се бара невозможното. Здравјето ни го зедоа“, изјавила работничка која работи во текстилна фабрика на странски газда во Битола.
„Работниците се присилени да ја враќаат разликата помеѓу минималната плата и заработената плата (број на работни часови и плата за работен час) кај сопственикот на фирмата на рака“, вели работник од фабрика во Куманово . И работник од фирма во Кратово вели дека платата не е им е покачена.
Кристина Ампева од „Гласност“ вели брзата одлука на Уставниот суд која дури и нив ги изненадила им дава законска сигурност на работниците.
„Работниците сега треба да знаат дека Законот ги штити и дека мора да им биде исплатена минимална плата од 12 000 денари“, вели Ампева која ги охрабрува работниците да ги пријавуваат сите прекршувања на работничките права.
„ Работничките права посебно во текстилните фабрики се прекршуваат и за празници, викенди кога работниците работат, а не им се плаќа. Исто така не се евидентира ниту прекувремено работење“, вели таа.
Ампева бара поголем ангажман од трудовата инспекција за да се имплементира одлуката на Уставниот суд за исплата на минималната плата но и да се спречат прекршувањата на работничките права.