Претседателката на Уставниот суд Добрила Кацарска денеска на работниот состанок со претседателот на државата Стево Пендаровски, на Собранието Талат Џафери и на Владата Димитар Ковачевски, информираше за сериозноста на ситуацијата со која е соочен Уставниот суд во последните шест месеци бидејќи функционира со пет судии од вкупно девет, колку што се предвидени во Уставот.
„Поради недостаток на судии повеќе од 30 предмети не може да добијат мнозинство и се одолговлекуваат за понатаму, а штетата ја трпат граѓаните“, посочи Кацарска.
„Судот не може во целост да ја оствари улогата на заштитник на граѓанските слободи и права и да одлучува за согласноста на законите со Уставот како и на другите прописи и на колективните договори со Уставот и законите. Поради наведените причини, оваа состојба не е проблем само за функционирањето на Уставниот суд, туку и на државата и токму затоа денеска на работен состанок ги повикав тројцата претставници на најважните институции кои ја водат државата. Ги информирав за сериозноста и отежнатото функционирање на Уставниот суд и согласно нивните надлежности и тежината на нивните функции очекувам државата да се вложи во побрзо надминување на оваа состојба”, вели Кацарска.
Претседателката на Уставниот суд откри и дека во декември оваа година завршува мандатот на уште еден судија и ако до тогаш не се комплетира Судот, државата ќе влезе во уставна криза.
„Уставниот суд функционира на граница на кворум и многу луѓе се засегнати од предметите кои заостануваат, како на пример Законот за социјална заштита, Законот за јавно обвинителство, одлуки со кои се оспоруваат детални урбанистички планови, барања за слободи и права на граѓаните“, истакна Кацарска.
Претседателката на Уставниот суд посочи дека освен предметите кои не добиваат мнозинство, проблемот со недостатокот на судиите се рефлектира и врз можноста да се спроведат големи реформи во Уставниот суд, како што е донесувањето на нов Акт, бидејќи Судот се уште работи според Деловник кој е донесен во 1992 година.
По споделувањето на информациите од страна на претседателката на Судот Добрила Кацарска, тројцата претседатели констатираа дека моменталната ситуација е загрижувачка и дека во интерес на државата и на сите граѓани е Уставниот суд да работи во комплетен состав и согласно нивните надлежности најавија поддршка за надминување на овој проблем.
Во рамки на овој работен состанок претседателката на Судот Добрила Кацарска го отвори и прашањето за воведување на уставна тужба во услови на комплетиран состав на Уставниот суд, побара поддршка и нагласи дека со овој уставен инструмент ќе се отвори можноста за граѓаните побрзо да дојдат до правдата, наместо со години да чекаат одлуки од Европскиот суд за човекови права, да не се изложуваат на големи трошоци пред судот во Стразбур и да им се овозможи овде во својата држава да ги користат сите правни лекови.
Претседателот на Собранието Талат Џафери, кој покрај шефот на државата Пендаровски и на Владата Ковачевски, беше еден од учесниците, ја нарече денешната средба „историска“ од овој формат на трите власти. „Главното прашање кое беше и повод за оваа прва и историска средба од овој формат на трите власти во државата, беше прашањето што го отвори претседателката Кацарска, за воведување на институцијата уставна тужба со која би се отворила можност граѓаните да стигнат побрзо до очекуваната правда, без да ја бараат истата од меѓународните судови. Поддршката ја побара затоа што за тоа да се направи, ќе мора да се отвори Уставот“, соопшти неговиот кабинет.
Во однос на неизборот на уставни судии кој ја парализира работата на Уставниот суд, тој топката ја префрла во собраниската комисија.
„Постапката за избор на нови уставни судии е заглавена во Комисијата за избори и именувања и единствено што може е да се апелира до колегите да се однесуваат државнички и да овозможат одблокирање на изборот за час поскоро да се комплетира Уставниот суд и да може да продолжи со нормално функционирање и во полза на граѓаните“, јави прес-службата на Џафери. (С.К.)