Предлогот „Република Илинденска Македонија” треба да се разгледа длабински и да не се отфрла, зашто „ги исполнува очекувањата на мнозинството граѓани на двете земји“ и може да стави крај на деценискиот спор меѓу двете земји, рече денеска премиерот Заев кој пакетот решение го оцени како вин-вин ситуација за двете земји.
„Република Илинденска Македонија е име кое не го загрозува, туку напротив го зајакнува идентитетот на Македонија, а на Грција и дава сложено име со временска одредница“ рече Заев.
На реакцијата од Владата на Грција дека го поздравуваат тоа што македонската страна прифатила „ерга омнес“, но да се најде заемно прифатливо име со географска или временска одредница, како што е предложено од страна на специјалниот пратеник на ОН, Метју Нимиц, Заев вели дека се работи за пакет кој не може да се дели.
„Зборуваме за пакет, а не за поединечни делови. Не може да се очекува уставна промена во Македонија за било кое решение, затоа ние прифативме уставна промена, затоа што е решение кое не не понижува. Ќе го сочуваме нашето достоинство, а притоа идентитетските прашања се фиксирани, а притоа ги исполнуваме и нивните услови“, рече премиерот Заев.
И министерот за надворешни работи Никола Димитров во синоќешното интервју на 1.ТВ рече дека „ова не е супермаркет, секој да си бира што му се допаѓа“ и дека секогаш во преговорите одредницата била споена со опфатот – ако имало тесен опфат, тогаш имало флексибилност за одредницата, ако се барало максимален опфат – нема флексибилност.
На средбата со грчкиот министер за надворешни работи Коѕијас и медијаторот Нимиц во Њујорк, Димитров најави дека ќе разговара за „она што го имаме на маса, бидејќи длабоко верувам дека и кај нас и кај нив има многу причини зошто токму оваа опција треба да го затвори проблемот“.
Предлогот „Илинденска Македонија“ Димитров потврди дека го предложила македонската страна за да се најде предлог со кој се прави јасна дистинкција од регионот Македонија во Грција, има временска одредница, без никакви територијални претензии, а од друга страна е достоинствено решение кое не го нарушува, туку го зајакнува идентитетот, бидејќи го има во двете Преамбули на Уставот – од 91, и од 2001. Во пакетот за името, Грците се согласни дека ја признаваат македонската нација, а јазикот со овој предлог треба да биде македонски, со превод на сите јазици, со што не се загрозува македонскиот идентитет.
„Јас сум убеден дека и во двете држави има сили кои нема да прифатат било какво решени, дури и да е решение кое го прифатиле додека биле на власт“, рече Димитров.
Портпаролот на грчката Влада денеска повтори дека „најдобро решение е избор на едно име од оние што ги достави медијаторот Нимиц во неговите предлози.
Во следните неколку дена ќе се знае што ќе биде исходот на преговорите закажани за 24 и 25 мај во Њујорк со специјалниот претставник на ОН, Метју Нимиц. Од епилогот на оваа средба според грчките медиуми ќе зависи дали премиерите Ципрас и Заев ќе се сретнат на почетокот на јуни – можеби во Преспа.