Претседателот на Собранието Талат Џафери за утре закажа седница на Комисијата за уставни прашања на која ќе се отвори дебата за владиниот предлог за уставни измени. Собраниската седница на која ќе треба да се гласа по Предлогот за пристапување кон уставни измени ќе се одржи во понеделник.
Од СДСМ денеска ги повикаа пратениците од ВМРО ДПМНЕ да ги подржат уставните измени.
„Предлог уставните измени се јавно објавени и се достапни до целата јавност. Секој граѓанин, секој пратеник може да ги погледне и да се увери во вистината. Со предлог измените се потврдува сето она што го говоревме изминатиот период. Идентитетот, јазикот и македонската посебност се загарантирани и трајно заштитени. Паѓаат во вода сите лажни вести и измислени конструкции за наводно загрозување на македонскиот јазик, македонскиот идентитет и македонската историја“ рече пратеникот Александар Кирацоски од СДСМ.
Според Кирацоски со уставните измени се зацврстува историскиот континуитет на македонската државност, се обезбедува поцврста гаранција на границите и територијалниот интегритет и се обезбедува грижа за Македонците и иселениците од Македонија во странство, согласно меѓународните стандарди, без мешање во внатрешните работи на било која друга држава.
Кирацоски ги повика пратениците на ВМРО ДПМНЕ да не подлегнуваат на притисоци и закани.
„Овие закани доаѓаат од раководството на ВМРО ДПМНЕ , но пратениците треба да знаат дека институциите им стојат на располагње за да ги заштитат и да се чувствуваат безбедни“ кажа Кирацоски.
Тој тврди дека во контактите што ги имал со пратеници од ВМРО ДПМНЕ „бил пријатно изненаден колку истите стојат на линија на оваа историска обврска и одговорност и се за клучните измени во Уставот на Република Македонија“.
Од ВМРО ДПМНЕ негираат дека партијата вршела притисок врз своите пратеници.
„ Шпекулации се наводите дека пратениците добивале закани или пак дека биле под притисок од партијата. Власта е таа која се заканува и уценува “ рече портпаролот на ВМРО ДПМНЕ Димче Арсовски.
Според Арсовски шпекулации се и наводите дека пратеници на ВМРО-ДПМНЕ прифатиле да гласаат за промените на Уставот предвидени со преспанскиот договор.
Според Деловникот секој пратеник и во Комисијата и на пленарната седница може да зборува повеќепати, но не вкупно повеќе од 20 минути.
Ако Собранието на пленарна седница со најмалку 80 гласа донесе одлука за пристапување кон измена на Уставот, се преминува кон втората фаза – подготовка и утврдување на нацрт-амандманите за што се потребни 61 глас. По ова се организира јавна дискусија и следува третата завршна етапа од постапката за измена на Уставот.
Конечната одлука за усвојување на амандманите се носи со најмалку 80 гласа, а за амандманот на преамбулата освен двотретинско, е потребно и Бадентерово мнозинство.
Владата вчера на вонредна седница усвои Предлог за четири уставни амандмани – за додавање на додавката Северна во името Република Македонија, за измени во Преамбулата, и за измени во членовите 3 и 49.
Според роковите пропишани во Деловникот, целата постапка за уставни измени може да заврши најрано за три и пол месеци, но Претседателот на Собранието Џафери рече дека постапката може да биде и итна по барање на Владата, на претседателот, на 20 пратенци и на претседателот на Собранието.