Утре од сабајле премиерот Зоран Заев ќе му ги достави на Собраннието предлозите за реконструкција на Владата. Kако што рече, имињата се утврдени, а до утре наутро ќе бидат собрани биографиите за министерските и заменичките места.
-Реконструкцијата ќе ја предложам до парламентот утре затоа што поради пресудата не знаев дали ќе имам цела влада или ќе треба да правам реконструкција. Биографиите на новите министри ќе бидат собрани до утре изутрина и ќе бидат навреме поднесени до Парламентот, кој се надевам дека до крајот на месецот ќе ја изгласа реконструкцијата на владата“, изјави Заев.
Заев претходно оопшти дека е постигнат договор со ДПА, крилото на Беса на Африм Гаши, како и со Сојузот на Ромите на Амди Бајрам.
БЕСА на Гаши го номинира Асаф Адеми за нов министер за култура. Адеми е поранешен амбасадор во Данска како и кандидат за градоначалник на Гостивар од БЕСА.
Адеми во моментот е генерален директор на данска компанија.
ДПА ги предложи Бардиљ Даути, за министер без ресор задолжен за странски инвестиции и Митасин Бекири, како заменик министер за транспорт и врски.
Неофицијално, промени ќе има и во ресорите образование и правда. Актуелната министерка за образование Рената Дескоска ќе биде прв човек во Министерството за правда, кое остана празно по оставката на Билен Салији. На чело на образование ќе биде предложен Арбер Адеми, актуелен заменик министер за образование, кој во 2016-2017 година беше вицепремиер за европски прашања.
Прашана како ги коментира шпекулациите за нејзиниот трансфер во Министерството за правда, Дескоска денеска изјави: „Мислам дека толку се интензивираа што веќе денеска не се ни на ниво на шпекулација“.