Утре треба да се распушти Собранието, по иницијативата на СДСМ која беше поддржана од ВМРО-ДПМНЕ, со услов претходно да се усвои буџетот.
Владеачката коалиција веќе подолго време притиска буџетот за 2017 година да се донесе сега и да го изгласа овој состав на Собранието. Опозицијата предлага буџетот да го носи новата влада, по изборите, а во меѓувреме да се воведе привремено финансирање.Што се однесува до законите што ги бараше Специјалното јавно обвинителство, за заштита на сведоците и за продолжување на мандатот и тие најверојатно утре ќе бидат на дневен ред, на предлог на пратеникот Павле Трајанов.
Ќе се расправа и за проблемот со вишокот гласачи во шестата изборна единица за што доесга не се најде решение, а Министерството за правда го премолчи проблемот.
Проблемот се состои во тоа што секоја од шесте изборни единици треба да има сличен број запишани гласачи, со дозволено отстапување од +/- пет отсто. Во „шестката“ има 5,28 проценти повеќе гласачи од дозволеното. Аргументите се дека од една изборна единица со 280 илјади гласачи и во друга изборна единица со 305 илјади се избираат по еднаков број пратеници – 20.
Еден од предлозите е гласачите од Дебар да се префрлат во петата изборна единица, со што би се дошло до некакво урамнотежување на бројките.
Државната изборна комисија веќе подолго време предупредува на ова, за што има и официјално барање до Собранието и до Министерството за правда, но досега никој не реагираше.