Канцеларијата на Обединетите Нации за човекови права, со седиште во Женева, вели дека има се повеќе докази за воени злосторства извршени од руските сили обвинети за неселективно гранатирање и бомбардирање населени области, уништување болници, училишта и друга цивилна инфраструктура. Покрај неселективните напади и попречувањето на медицинска нега, има стотици извештаи за произволни убиства и сексуално насилство, откако Русија го започна својот напад пред речиси два месеци.
Меѓународното хуманитарно право е суспендирано во Украина, а руската инвазија доведе до „ужасни приказни“ за кршење на човековите права, изјави Мишел Башелет, висок комесар на ОН за човекови права. „Нашата досегашна работа детално ја покажа ужасната приказна за повредите нанесени на цивили“, рече таа.
Канцеларијата на ОН потврди 5.264 цивилни жртви – 2.345 убиени и 2.919 повредени – од почетокот на војната на 24 февруари. „Знаеме дека реалните бројки ќе бидат многу поголеми кога ќе излезат на виделина ужасите во областите на интензивни борби, како што е Мариупол“, вели Башелет. „Се појавуваат податоци за случајни егзекуции на цивили во областите окупирани од руските сили“, додаде таа, осврнувајќи се на добро документираниот масакр на жителите во киевското предградие Буча.
Притоа се наведуваат и 75 обвиненија за сексуално насилство врз жени, мажи и деца, главно во регионот на Киев поднесени до Канцеларијата на ОН.
Канцеларијата изброи и 114 потврдени напади врз медицински установи во Украина. Но, се претпоставува дека вистинскиот број е уште поголем.
Нападот на 8 април на железничката станица Краматорск, во кој касетна муниција уби 60 цивили, покажа дека се игнорираат принципите на меѓународното хуманитарно право, додаде Башелет.
Во меѓувреме, Андриј Небитов, началникот на полицијата во регионот на Киев, рече дека неговите сили откриле околу 1.000 тела откако руските сили се повлекле од градот. Новите сателитски снимки укажуваат на можна масовна гробница надвор од Мариупол. (од новинските агенции)