Во петок во Скопје македонски и српски претставници ќе одржат состанок за надминување на проблемот со извозот на српското брашно во Македонија, откако во саботата, деловната асоцијација на индустриски мелници, пекари и производители на тестенини „Житоунија“ од Нови Сад ги обвини македонските власти дека со неодамна воведените мерки придонеле увозот на брашно од Србија да биде „речиси неисплатлив“.
Ова утрово го договориле македонскиот министер за земјоделство Љупчо Николовски и српскиот министер за трговија Расим Љајиќ.
– Во петок во Скопје закажавме состанок и се надевам дека ќе успееме да изнајдеме некакво решение, кое, пред се, ќе биде во интерес на стопанствениците од двете земји и нема да ја загрози надворешната трговија и во еден и во друг правец, ниту ќе не натера да преземеме какви било контрамерки, изјави Љајиќ, додавајќи дека таквите мерки се на директна штета на стопанствениците и на меѓудржавните економски односи.
Како што се наведува во соопштението од српскиот министер, двајцата министри, вчера, телефонски разговарале за начинот како да се реши проблемот на отежнатиот извоз на брашно од Србија на македонскиот пазар, откако „Владата во Скопје ги смени процедурата за увоз и методот на издавање контролни марки“.
Здружението Житоунија поднесе иницијатива до министерот Љајиќ веднаш да и се воведат реципрочни мерки за одредени македонски производи.
– На увозниците со тоа значително им се зголемени трошоците и бизнисот со Србија станува економски неисплатлив. Реално е да се очекува пад на извозот на српското брашно, изјави за весникот Политика, Здравко Шајатовиќ, претседателот на „Житоунија“.
Според новите процедури, српското брашно се извезува во Македонија без македонски маркици. Потоа брашното се складира тука, а по фитосанитарниот преглед увозникот може да ги користи маркиците и потоа да ги истакне на производот. Меѓутоа, брашното мора да се распакува и да се ангажираат дополнителни луѓе, а процедурата може да потрае и цел месец.
За српските производители, Македонија претставува трет извозен пазар, каде годишно се пласираат 30.000 до 40.000 тони брашно.