СОЊА КРАМАРСКА

 

Група ванчомихајловисти од пред една недела се наоѓаат во тајна советничка мисија кај шефот на ВМРО-ДПМНЕ Христијан Мицкоски со цел да му го урнат тешко заработениот политички рејтинг.

Вакво инфилтрирање на непријател во срцето на политичка партија не е видено во досегашната 31-годишна плурална историја на Македонија.

Новите советници на Мицкоски го советувале да каже дека ВМРО-ДПМНЕ е партија која е дел од континуитетот на организација на чие чело бил и Ванчо Михајлов. Претседателот на ВМРО-ДПМНЕ ја голтнал јадицата, што е преседан за погрешно расудување и политички капацитет на еден лидер на партиската сцена.

Резултатот од оваа мисија го гледаме. Предводникот на опозицијата, и кандидат за премиер, секојдневно си ја руши позицијата пред партиското членство, во јавноста, дома и во странство. Првин минатата седмица во телевизиско интервју рече дека неговата партија нема потреба да се оградува од Ванчо Михајлов, оти тој е дел од еден континуитет којшто ВМРО-ДПМНЕ го има преземено и тој континуитет треба да се почитува. Овој проблематичен став го потврди и денес, во друго интервју.

„На дел од конгресите претседател на ВМРО е Иван Михајлов. И да, тој бил во егзил во Загреб каде што живеел и соработувал со тогашната НДХ која била фашистички односно нацистички сојузник. Јас не се согласувам со тоа како тој ја управувал таа партија или организација во тоа време, како се однесувал и со кого соработувал. Како што можеби за некој по неколку децени нема да се согласува со тоа како јас или некои од моите претходници ја водел ВМРО-ДПМНЕ во историска смисла. Но ова е континуитет на една организација која што во современото време станува политичка партија“, вели во најновата изјава Мицкоски.

И да знае дека многумина нема да се согласат со начинот на кој ја водел ВМРО-ДПМНЕ. Не после децении, туку уште денес и утре. Таков лидерски гаф, таков политички фаул, таков автогол, не е виден долго време на овие простори.

Затоа и шегата на почетокот на овој напис дека му се инфилтрирале ванчимихајловистички советници со цел да му го срушат рејтингот.

Недостасуваат само уште неколку факти. Партијата на чие чело е господинот Мицкоски, бурно реагираше на отворањето на бугарскиот клуб Ванчо Михајлов во Битола. Мислам дека дури и го нарекоа предавство на македонските национални интереси. Фрчеа партиски соопштенија ден за ден.

„Срамно, Маричиќ дозволува бугарски клубови со навредливи имиња во Македонија….“, се велеше во едно соопштение. „СДС да си расчисти во коалицијата за ликот и делото на Михајлов, под нивна власт се формирани клубовите Цар Борис и Михајлов“, викаа во друго соопштение. „Финансиерот на фашистичките клубови, главен гостин кај СДС во влада“ – трето соопштение.  „СДС дозволи формирање на клубот Цар Борис, исто како што претходно дозволи формирање на клубот Ванчо Михајлов. Владата на СДС доколку не поддржува фашизам ќе испратеше барем една протесна нота, но од тоа ни трага ни глас“, четврто соопштение.

„Ова што се случува е силување на македонскиот народ, неговото антифашистичко минато преку наметнување на вредности на третиот рајх затскриени преку злоупотребата на европската ѕвезда“, довикуваше Рашела Мизрахи.

Човек навистина да помисли, слушајќи го сега Мицкоски, дека тој добива совети кои се во корист на неговата сопствена штета.

Колегата Борјан Јовановски пред неколку дена напиша дека во своите идеолошки авантури ВМРО ДПМНЕ ризикува да го изгуби своето демохристијанско тло и дека застранувањето во анахрони наративи не само што и ја одзема моќта да делува како ефикасна опозиција, туку дополнително си ги загрозува и капацитетите за преземање на власта. Целосно се согласувам.