На денешната општа седница судиите на Врховниот суд одлучија претседателот на судот, Јово Вангеловски да остане во Кривичниот совет да одлучува за притворот на осомничениот бизнисмен Сеад Кочан во случајот на СЈО „Труст”.
На 30 март Специјалното јавно обвинителство побара изземање на Вангеловски затоа што и тој бил во дел од прислушуваните материјали.Врховните судии го одбија и приговорот на судијката Лидија Неделкова која се жалеше на одлуката на Вангеловски да ја тргне од Кривичниот совет, иако според електронската распределба и она требаше да одлучува за предметот за Кочан.
Поранешната претседателка на Врховниот суд Неделкова претходно се изјасни дека за случајот со притворот за Кочан единствено надлежно е СЈО, а не и Јавното обвинителство. На 27 март Јавното обвинителство до Врховниот суд поднесе барање за заштита на законитоста и поништување на одлуката за притвор на Кочан.
На општа седница, која е затворена за јавноста, Врховниот суд одлучува и за приговорите на десетина судии за нивниот годишен распоред во Основниот суд Скопје 1, потпишан од новиот в.д. претедател Стојанче Рибарев.