Претседателот на ЗНМ на денешната прес-конференција соопшти дека ако измените на законот бидат на линија на предлогот на оној што го предложи Питер Ванхауте, тогаш ЗНМ ќе го поддржи процесот на усвојување на законот.
„Очекуваме владата брзо и внимателно да го подготви законот. Сега немаме време за губење и за експериментирање. Инсистираме овој предлог да помине во Собранието така како што е предложен, а во наредниот период можеме да отвориме и други прашања, кои се важни за слободата на говорот и слободата на медиумите“, истакна Селмани.
На прес-конференцијата, Ванхауте сугерираше дека Министерството за внатрешни работи да изготви извештај за сите напади против новинарите и да ги изведе насилниците пред лицето на правдата. Тој истакна дека праксата на неказнивост мора да престане.
„Апсолутно е неприфатливо новинар да се држи во притвор три години“, рече Ванхауте посочувајќи го случајот на Божиновски.
Тој повтори дека неговиот предлог за итни реформи е одлична основа за сериозен напредок во однос на подобрувањето на медиумското законодавство, која ќе ја зајакне независноста и професионалноста на Македонската радиотелевизија.