Модниот стилист Сергеј Варошлија, сопственичката на оптика, Марија Јанковска и сопственикот на галерија, Алекс Кртов, денеска сведочеа на судењето за случајот „Рекет“ за познанството со обвинетиот Бојан Јовановски – Боки 13 и неговиот стил на живот. Варошлија, кој сведочеше трет, рече дека со Бојан Јовановски се познава повеќе од 15 години со кого има соработувано и дружено.
„Често патувајќи среќаваше многу познати луѓе од модниот бизнис. Поради својата различност и често беше канет на разни ревии и промоции. Често му подаруваа парчиња облека зашто го сметаа за инфлуенсен балкански лик“, изјави Варошлија.
По отворањето на „1ТВ“ рече дека бил вработен како заштитно лице.
„Прво имав авторски договор, а потоа бев вработен. Добивав плата на сметка“, рече Варошлија.
Ана Камчева му била клиентка, а Зоран Милевски, најпрво го знаел од град, а потоа и интензивно кога почнал да се дружи со Јовановски.
„Доаѓаше во „1ТВ“ и дома кај Бојан Јовановски. Често одевме на ручеци и вечери. Еднаш има дојдено во телевизијата со Ана Камчева“, рече Варошлија.
Еднаш, посочи Варошлија, бил поканет на ручек во ресторан од Бојан Јовановски на кој била и Ана Камчева. На прашање од обвинетиот Бојан Јовановски, како се финансирала „1ТВ“, Варошлија рече дека имале многу клиенти и реклами, посочувајќи еден од начините дека требал да ја промовира водата „Пелистерка“ во неговата емисија. На прашање од обвинителката Вилма Рускоска, дали му е познато дека има фискални сметки за брендираната облека, Варошлија рече дека не му е познато, но и дека не тврди дека се му е подарено.
Прва сведочеше Марија Јанковска, која е сопственик на оптика. Таа рече дека повеќе години се познаваат со Боки 13 со кого соработувале и му давала очила како на позната личност за промоција на нејзината продавница. Заедно патувале во Франција, во Италија и во Грција каде присуствувале на разни модни настани или на одмор.
„Секогаш се сум си плаќала сама. Сместување, пат и трошоци. Кога сме оделе на модни ревии и настани на Бојан некогаш му даваа и разни парчиња облека од познати марки како промоција за влијателна личност“, изјави Јанковска која одговараше само на прашања од адвокатот на Бојан Јовановски додека обвинителката не постави ниту едно вкрстено прашање.
Вториот сведок Алекс Кртов, сопственик на галерија, рече дека Бојан Јовановски му бил муштерија и му врамувал огледала за станот во Орман.
„Му правев некое огледало за станот во Орман. Имаше добар стан и тогаш го уредуваше. Јас му предложив да ставиме некои уметнички слики да постојат некое време. Знаете во тоа време тој беше скопска ѕвезда и таму се вртеа еминентни луѓе. Мене ми беше идеја по некое време да направиме аукција на телецизијата што ја водеше тогаш“, изјави Кртов.
Судењето за „Рекет“ се наоѓа во доказна постапка и го води судијката Васка Николовска-Масевска, а застапник на обвинението е Вилма Рускоска. На денешно рочиште требаше да бидат сослушани уште тројца сведоци, но Владимир Тодоровиќ, Дејан Панделески и Јовче Ременски беа повлечени од одбраната, а сведокот Лидија Јаневска доставила медицинска документација дека е под стрес и не може да сведочи.
Основното јавно обвинителство за гонење организиран криминал и корупција во октомври лани поднесе обвинение против Бојан Јовановски, Катица Јанева и Зоран Милевски. Првообвинетиот Јовановски се сомничи дека сторил кривично дело „перење пари и други приноси од казниво дело“ и за „примање награда за противзаконито влијание“. Второобвинетата Јанева се товари дека сторила кривично дело „злоупотреба на службена положба и овластување“. На првото рочиште за „Рекет“, што се одржа на 3 декември минатата година, третообвинетиот Зоран Милевски-Кичеец призна вина за делото „примање награда за противзаконито влијание“, по што беше осуден на три години затвор.