Александар Василевски Нинџа денеска се појави во скопскиот Кривичен суд во улога на сведок во предметот за организацијата на настаните од 27 април во 2017 година. Тој пред присутните во судницата, меѓу кои беа и обвинетите Трајко Вељаноски, поранешен претседател на Собранието, Миле Јанакиески и Спиро Ристовски, поранешни министри и Владимир Атанасовски, поранешен директор на Управата за безбедност и контраразузнавање (УБК), ја изнесе сопствената верзија за случувањата што претходеле на денот на насилниот упад во Собранието.
Вечерта по изборниот ден на 11 декември во 2016 година, истакна Василевски, раководството на ВМРО-ДПМНЕ и партиски функционери ја славеле победата во „Скај бар“ во хотел „Русија. Два дена по забавата биле поднесени приговори, па почнале организирани протести пред Државната изборна комисија (ДИК) за кои насоките доаѓале од ВМРО-ДПМНЕ.
„Имаше насоки да се влезе во зградата на ДИК и да се дејствува во насока на заплашување на членовите на Комисијата да не одлучат спротивно на замислата на ВМРО-ДПМНЕ. Случувањата од 27 април ќе беа и порано ако одлуката на ДИК беше во корист на СДСМ“, рече Александар Василевски Нинџа.
Одлуката на ДИК била во корист на ВМРО-ДПМНЕ, но партијата, сепак, не формира влада и се организираа протести под мотото „За заедничка Македонија“.
„За повикување на масовност на протестите се одеше преку генералниот секретар Кирил Божиновски, преку организациониот секретар Спире Ристевски“, кажа Василевски.
Протестите, како што тврди Василевски, ги организирала ВМРО-ДПМНЕ преку општинските и месни комитети, а вработени во градинки, во Водовод и канализација и други институции кои биле членови партијата требало да излезат и да ги поддржат.
Василевски за време на денешното сведочење рече дека по наредба на Атанасовски биле следени и функционери од СДСМ, меѓу кои и Зоран Заев и Оливер Спасовски и покрај тоа што бил технички министер за внатрешни работи, но и политичкиот аналитичар Алберт Муслиу кој бил наклонет кон СДСМ.
Александар Василевски Нинџа е осуден на осум години затвор во најобемниот судски процес за истите настани. Неговите искази и како обвинет и како сведок директно го инволвираат тогашното раководство на ВМРО-ДПМНЕ во организација на настаните од 27 април во 2017 година.
Одбраната пред почеток на денешното рочиште се изјасни против сведочењето на Василевски со образложение за контроверзен исказ кој го дал во тек на истрагата за организаторите што се поклопува со периодот пред изрекување на пресудата.
„Преголема е случајноста во датумите кога го има дадено својот исказ во фазата на истрага. Тоа е периодот по завршување на главната расправа, односно пред објавување на пресудата во предметот во кој е обвинет Василевски. Друго, во произнесувањето на еден од неговите адвокати пред Апелација наведе дека по инсистирање и барање на неговиот клиент, бил во преговори Нинџа да добие статус на соработник на правда, а откако тоа не му било удоволено, истиот преговарал за поволности во однос на изрекување на казната“, рече адвокатот Еленко Миланов.
Судот сепак одлучи Василевски да сведочи, а судијата Илија Трпков рече дека неговото сведочење е под заклетва, како и дека станува збор за два различни предмета. Пред почеток на денешното сведочење, Василевски повтори дека поради исказите за предметот „27 април“ е под постојани закани од политички и безбедносни структури во изминатите две и пол години додека е во притвор. Се претстави како бивш соработник на УБК со псевдоним „Самурај“, кој бил ангажиран во 2015 година од поранешниот началник, Горан Грујевски.