Фудбалската репрезентација на Италија веќе пристигна во Скопје. Додека составот на Џампјеро Вентура леташе кон Македонија за квалификацискиот дуел во Г групата за мундијалот во 2018 година во Русија, селекторот Игор Ангеловски и капитенот Горан Пандев ги споделија впечатоците од досегашните два настапа и очекувањата од претстојниот меч.
Македонската публика има ретка можност да поздрави противник на националната арена како е Италија. Како планетарни прваци во четири наврати и континентални од пред, релиси, 50 години „азурите“ вчерапопладне пристигнаа во Скопје. Ќе рече некој тоа е минато, тоа е историја. Меѓутоа Италијанците допатуваа во главниот град и со уште импресивен податок зад себе. Составот што моментно го предводи Вентура (го презеде од Антонио Конте по завршување на Европското првенство во Франција) не знае за пораз во 53 квалификациски средби едноподруго.
„За Италија нема потреба да се трошат премногу зборови. Сите знае каква репрезентација е, каков фудбал игра, каква фудбалска историја има. Четирикратен светски шампион што е без пораз во 53 натпревари и важи за апсолутен фаворит“, истакна македонскиот селектор Игор Ангеловски, на вчерашната прес конференција.
Гостувањето на Италија, за Ангеловски е празник на фудбалот во нашата земја. Нагласи дека двете земји имаат, фудбалски, допирни точки. Како една од основните го исвои Горан Пандев кој подемот, славата и статусот што го градеше низ години го стекна токму таму. Одлично ги познава играчите во италијанскиот национален тим кои сами по себе се екстра мотив и за него и за колегите.
„Сакаме да ги повториме добрите страни што ги истакнавме против Израел во четврток и во истовреме да ги елиминираме лошите што ги демонстриравме. Статисти не сакаме да бидеме. Сакаме да играме и видиме до каде сме“, порача Ангеловски кој најави изведување на состав во формација 3-5-2 меѓутоа и дека не планира да направи сериозни промени во тимот.
Искуството и присуството на Горан Пандев во оваа репрезентација на Македонија е од големо, непроценливо, значење иако капитенот не знае за гол во националниот дрес веќе подолг период. Нема постигнато осум години во квалификациски средби, а запрашан дали тоа прави одреден вид на притисок врз него, тој е категоричен.
„Головите се, секако, важни за секој напаѓач. Но, за мене лично не се приоритет. Дај боже Горан да не постигне гол уште 20 години, само Македонија да победува и се радува“, рече Пандев на средбата со новинарите.
Пандев жали за поразите во двата претходни меча во квалификациите за СП 2018 година. Вели Македонија одиграла добро и во Скадар против Албанија и во Скопје против Израел, но немала среќа да освои бодови.
„Пред нас е тежок натпревар. Доаѓа Италија за која посебни мотиви не се потребни. Одлично ќе беше ако влеземе во мечот со некој бод. Штета. Болни беа поразите и од Албанија и од Израел, среќата во финишот ни го заврте грбот. Италлијанците се фаворити утревечер, Македонија, сепак, нема што да загуби“, нагласи капитенот на националниот тим на Македонија.