Ниту стравуваат од Македонија, ниту се гледаат како фаворити во денешниот дуел против Македонија во квалификациите за фудбалскиот мундијал во 2018 година. Израелците на настапот на „Филип Втори“ гледаат како и за секој друг. Изразуваат респект за „црвено-жолтите“, но признаваат дека се дојдени во Скопје да победат.
„Дојдовме со големи очекувања. Сакаме да ја повториме играта од мечот со Италија и до израз да дојде колективот. Не мислиме дека ќе доминираме од почеток, но мислиме дека имаме сили до посакуван резултат на крајот“, истакна капитенот на израелскиот состав Еран Захави кој моментно настапува за кинески Гвангжу.
Тимот на Израел е свесен за квалитетот што го поседува, но свесен е дека ќе треба и да се одработи на терен.
„Мислењето дека Македонија е само Горан Пандев е погрешно. Закани по нашиот гол нема да доаѓаат само од него. Има Македонија и други квалитетни поединци во состав што знаат и можат да бидат опасни. Не криеме дека ја посакуваме победата пришто ќе треба да бидеме внимателни, концентрирани и трпеливи во текот на средбата“, вели Елиша Леви, кормилар на Израел.