Со натпреварот меѓу Турција и Италија вечерва во 21 часот, ќе стартува Европското фудбалско првенство. Натпреварот ќе се одигра на „Олимпико“ во Рим, во рамки на групата А во која се наоѓаат и селекциите на Швајцарија и на Велс.
На ЕП 2020 ќе настапи и македонската фудбалска репрезентација. Дебито на „црвено-жолтите“ на континенталните првенства е в недела од 18 часот против Австрија во Букурешт. Пресметката е дел групата Ц во која се и репрезентациите на Холандија и на Украина.
Во групата Б ќе играат: Русија, Белгија, Данска и Финска, во групата Д се Чешка, Хрватска, Шкотска и Англија, во групата Е се Шведска, Полска, Шпанија и Словачка, додека епитетот „група на смртта“ го доби Ф конкуренцијата со репрезентациите на Германија, Франција, Португалија и Унгарија.
Европското првенство ќе се игра во 11 града ширум континентот – Рим (стадион „Олимпико“/капацитет 70.634), Букурешт (Национална арена/капацитет 55.600), Баку (Олимписки стадион/капацитет 68.700), Копенхаген (стадион „Паркен“/капацитет 38.065), Санкт Петербург (стадион „Крестовски“/капацитет 68.134), Лондон (стадион „Вембли“/капацитет 90.000), Амстердам („Јохан Кројф“ арена/капацитет 54.990), Глазгов („Хемпден парк“/капацитет 51.866), Севилја (стадион „Ла Картуха“/капацитет 60.000), Будимпешта („Пушкаш арена“/капацитет 67.215) и Минхен („Алијанц арена“/капацитет 70.000).
Од 24-те репрезентации учеснички на турнирот, во следната фаза ќе се пласираат двете најдобропласирани од секоја група, плус четирите третопласирани селекции со најдобар биланс.
Европското првенство ќе трае до 11 јули, за кога се закажани мечот за третото место и големото финале на „Вембли“ во Лондон.