Промени мора да има. Оваа битка ја водам и за вас и за вашата поддршка секојдневно копнеам. Поддршката ќе заврши со промената на оваа власт, порача лидерот на ВМРО-ДПМНЕ Христијан Мицкоски на вечерашниот протест пред Владата.
Tој го повика премиерот Димитар Ковачевски да го одбие францускиот предлог, a за барањето за предвремени избори рече дека доколку нема договор, ВМРО-ДПМНЕ ќе премине на целосна блокада на парламентот и на протести низ градовите.
– Тука сме собрани оваа вечер илјадници со име со чест со гордост и волја која мора да донесе промени. Од денеска, па натаму вашиот глас ќе татни низ градовите и селата на Македонија. Како громогласно ехо тргнуваме да ја освоиме победата која ни припаѓа, рече Мицкоски и додаде дека вечерва се случува народ.
Тој додаде дека народот секојдневно осиромашува поради неодговорната власт.
– Денеска сум овде пред вас и ветувам дека нема да разочарам.Тие ги имаат институциите, а јас заедно со вас го имам народот. Ви благодарам што се одваживте да дојдете. Ви благодарам што независно од сите закани, притисоци и уцени од власта, вие стоите овде до мене за заедно да ги менуваме работите на подобро, им порача Мицкоски на присутните.
Тој додаде дека е неопходна општествена поддршка за обединување и создавање на силни луѓе кои носат подобри времиња.
– На многумина им е прекипено од разочараноста и велат доста е. Народот сака борба и сака да се избори за својата Македонија, рече Мицкоски.