Додека европската пратеничка Маријана Петир во Скопје ја критикуваше македонската опозиција, во Брисел нејзината политичка фамилија, десната демо-христијанска Европска народна партија (ЕПН), сестринската партија на ВМРО-ДПМНЕ и најголемата политичка формација во ЕУ, конечно призна дека најсериозната пречка на нашиот европски пат не е спорот со Грција туку внатрешната политичка ситуација.

Центарот за студии на европските десничари во својот документ за проширувањето на ЕУ кон Балканот, вели дека политичката ситуација во Македонија останува да биде најголемата пречка за преговорите кои се условени со целосна примена на договорот од Пржино.

Во скицата што ја направи најголемиот поддржувач на ВМРО-ДПМНЕ во Европа се констатира дека Македонија, која некогаш била прва помеѓу земјите кандидати, назадува на многу полиња и денес, на чело со ВМРО-ДПМНЕ, се наоѓа во ќорсокак.

Демохристијаните сосема се согласуваат со извештаите на Европската комисија дека институциите на државата се се повеќе политизирани, дека има многу случаи на мешање во судството и во медиумите и дека во земјата нема реален напредок во борбата против корупцијата.

Понатаму се вели дека владата, наместо да ги намалува непотребните трошоци од буџетот, влегла во изградба на контроверзни проекти со статуи и владини згради кои чинат “многу милиони евра”, вели десничарската анализа. Според која сега е време за враќање на владеењето на правото а дури потоа избори.

Во Европскиот парламент, и позиција и опозиција, се согласуваат дека Македонија треба и мора да биде наградена поради помошта што и ја даде на Унијата во бегалската криза. Арно ама, блокираното Пржино ги спречува и најголемите поддржувачи на ВМРО-ДПМНЕ да го исполнат ова ветување.

За да не должам многу, ќе го цитирам холандскиот министер за надворешни работи Берт Кундерс. Кој, изморен од македонските политичари, реши да им испрати писмо. Во кое се вели дека пропаѓањето на Договорот од Пржино ќе ја изолира Македонија и ќе ни ја одземе сета надеж за награда и преговори за членство. Затоа што минималните услови за кредибилни избори не се исполнети, затоа што одлуката на Претседателот за аболиција мора да биде повлечена а специјалното обвинителство мора непречено да ја заврши својата работа.

Ова предупредување ја има сета поддршка на демо-христијанската сестринска партија на ВМРО-ДПМНЕ. Toa e и порака до ВМРО-ДПМНЕ која треба помалку внимание да и обрнува на Маријана Петир а повеќе на оние кои во Унијата навистина ги носат одлуките за нашата иднина.