Првиот човек на Фејсбук, Марк Зукерберг соопшти дека социјалната мрежа планира промени во политичкото рекламирање со цел истото да биде многу потранспарентно.
Неговата најава доаѓа со цел рекламирањето да не биде дел од владините регулативи, како што неодамна во САД побараа дел од Демократите.
Засега Фејсбук нема објавено повеќе детали за тоа какви промени планира да воведе, но во минатото, извршните луѓе на Фејсбук најавувале политики за рекламирање каде што кампањите би се третирале исто како и компаниските реклами.
Но тука произлегува дилемата за тоа како Фејсбук ќе одлучува што е политичко рекламирање а што не.
Некои политички пораки од типот на „Гласајте за кандидатот X“ се отворени и се лесно препознатливи, но други не. На пример рекламирањето за културата или за економијата може во себе да не содржат име на политичар, но притоа да имаат влијание при избори.
Зукерберг на ова се надоврзува, тврдејќи дека транспарентноста ќе излезе на виделина бидејќи ќе се бара јавно да се знае кој е спонзорот на објавата.
„Не само што ќе треба да се каже кој плаќа за рекламата, туку корисниците ќе имаат шанса да ја отворат страната на оној кој плаќа и да има увид какви други објави истиот испраќа до публиката“, објаснува Зукерберг.
Воедно како што вели тој, Фејсбук ќе ја зацврсти и ревизијата за политичкото рекламирање.
Ваквата објава од Зукерберг и извршните луѓе во една од најпопуларните социјални мрежи, доаѓа и по најавите на неколку влади дека планираат државни регулативи за политичкото рекламирање на Интернет.
Досега политичкото рекламирање на Интернет и социјалните мрежи не било регулирано како што е рекламриањето на ТВ или радио, бидејќи за Интернет е многу потешко да се креираат регулативи ако се знае дека е отворена мрежа.
Во САД, креаторите на законите јавно побараа стандарди за рекламирање на Интернет.
„Ја охрабруваме Федералната изборна комисија итно да постапи по заканите од странски социјални мрежи врз демократските процеси и да воведе правилник за тоа како платформите за рекламирање да не бидат под влијание на странски фактори кои би имале влијание врз изборите во САД“, се вели во писмото од Демократите во американскиот Сенат објавено во средата.
Ваквата кампања се почесто е во фокусот на јавноста по изборот на Доналд Трамп за претседаел на САД, каде што Демократите ги обвинија Републиканците дека преку руски фактор влијаеле на изборот на гласачите за кандидатите Доналд Трамп и Хилари Клинтон.